എത്ര ആത്മാര്ത്ഥമായി
വിട പറഞ്ഞാലും ,
പിന്നേയും എന്തിനോ
കാത്തു നില്ക്കുന്ന
ചില ഓര്മ്മകളുണ്ടാവും .
വിട നല്കാതെ
അതങ്ങിനെ തങ്ങി നില്ക്കും ,
പോകാന് മടിച്ച് .
നടക്കുന്നതിനിടയിലും
വീണ്ടും തിരിഞ്ഞു നോക്കും ,
തിരികെ വിളിച്ചോ
എന്ന് സംശയിച്ച് .
അവിചാരിതമായി
കോരിച്ചൊരിഞ്ഞൊരു മഴയില്
കയറി നിന്ന മരച്ചുവടില്,
വിജനതയില് ,
മഴയുടെ താളത്തിനൊത്തുയര്ന്ന
നെഞ്ചിടിപ്പില് ,
ശ്വാസച്ഛ്വാസത്തിന്റെ വേഗതയില്
പുണര്ന്നു നിന്നൊരു
നിമിഷം പോലെ .
കൊഴിഞ്ഞു വീണ
വാകപ്പൂവിതളുകള്
വിരിച്ച ചുവന്ന പരവതാനിയില്
കൈകള് ചേര്ത്തു നടന്ന
നടവഴികള് പോലെ ,
അണയുന്ന സൂര്യന്റെ
ചെങ്കതിര് വീണ്
കുറേകൂടി
ചുവന്ന കവിളിലെ
മായാത്തൊരുമ്മ പോലെ ,
ചിലതെല്ലാം
അങ്ങനെ കാത്തു നില്ക്കും
തിരിച്ചു പോകാതെ .
ഗോപിനാഥ് കെ .
No comments:
Post a Comment