അകന്നു പോകുന്നൊരു
സ്വപ്നം പോലെയാണ്
അവളെക്കുറിച്ചുള്ള
ഓര്മ്മകള് .
ആഹ്ളാദ നിമിഷങ്ങള്
നൊമ്പരങ്ങള് ,
ഇറ്റിറ്റു വീഴുന്ന കണ്ണുനീര്
തുള്ളികള്.
മായാതെ മനസ്സില്
തളം കെട്ടി നില്ക്കുന്നൊരു
ജീവിതം .
അവളുടെ വാക്കുകളില്
അടര്ന്നു വീണ
ശിഥിലമായ ചില ഓര്മ്മകളില്
അവളുുടെ ജീവിതം വേറിട്ടു നിന്നു .
വഴിമുട്ടി നില്ക്കുന്ന ജീവിതത്തിനു
നേരെ,അവള് പകച്ചു നിന്നില്ല .
അതിജീവനത്തിനായ് അവള്
തിരഞ്ഞെടുത്ത വഴികള് ,
ഒന്നൊന്നായ് കൈവിട്ടു
പോവുന്നതും നോക്കി അവള്
വെറുതെയിരുന്നില്ല,
വെറുതേയിരിക്കാന്
അവള്ക്ക് ആവുമായിരുന്നില്ല.
ജീവിതത്തിന്റെ
ദൈന്യംദിനാവശ്യങ്ങള്ക്ക്
കടം വാങ്ങിയ കാശ് വലിയൊരു
തുകയിലെത്തിയിരുന്നു .
തിരിച്ചു കിട്ടാനുള്ളവരുടെ
അമര്ഷം സ്വൈര്യക്കേടായി
വീട്ടു പടിയിലെത്തിയിരുന്നു .
അടുപ്പിലെ തീ
അണഞ്ഞു പോയിരുന്നു.
വിശപ്പിന്റെ അഗ്നി കുട്ടികളുടെ
കണ്ണില് തിരി കൊളുത്തിയിരുന്നു .
അതി ജീവനം മാത്രം
ലക്ഷ്യമായപ്പോള് വഴികള്
സാധൂകരിക്കപ്പെട്ടു .
ആഴിയുടെ ആഴങ്ങളിലും
അന്ധകാരത്തിന്റെ
അഗാധതകളിലും
വന്യമായ വനാന്തരങ്ങളിലും
ഹിംസ്രജന്തുക്കളുടെ
അട്ടഹാസങ്ങളിലും
അവളുടെ വാക്കുകള്
എന്റെ കാതുകളില് വന്നലച്ചു .
നഖക്ഷതങ്ങളും
മുറിപ്പാടുകളും
രക്തത്തുള്ളികളും ,
കണ്ടു ഞാനമ്പരന്നു .
പുളച്ചു മദിക്കുന്ന കാമത്തിന്റെ
പേക്കൂത്തുകളില്,
ബോധാബോധങ്ങളുടെ
സ്ഥലകാല മറവികളില് ,
തളര്ച്ചയുടെ
നിസ്സഹായതയില്
നീറിപ്പുകയുന്ന വേദനയില്
ശബ്ദങ്ങളായും ,
അക്ഷരങ്ങളായും
മുന്നില് വന്നെത്തിയ
അവളുടെ യാത്രാവഴികളുടെ
മൊഴിമുഴക്കങ്ങളില്
അനാഥമായവനെപ്പോലെ
നിസ്സഹായതയോടെ
കേട്ടിരുന്നതിന്റെ ഞെട്ടല്
ഇപ്പോഴും എന്നെ പിന്തുടരുന്നു .
എല്ലാം കൈവിട്ടു
പോവുന്നൊരു വേവലാതി
അവളുടെ വാക്കുകളില്
ചിതറുന്നുണ്ടായിരുന്നു .
തിരിച്ചു വരാനാവാത്തത്ര
ആഴത്തിലേക്ക്
ആഴ്ന്നു പോവുന്നതായി
അവളറിയുന്നുണ്ടായിരുന്നു .
ഒരു കവിതാ ഗ്രൂപ്പില്
ശ്രദ്ധയില് പെട്ട
അവളുടെ ഒരു കവിതയില്
നിന്നാണ് പരിചയം തുടങ്ങുന്നനത് .
കവിതകളില് തെളിഞ്ഞ
ബിംബങ്ങളുടേയും,
ആശയങ്ങളുടേയും
വരികള്ക്കിടയില്
അവളുണ്ടായിരുന്നു .
അവളുടെ വേദനകളും
അവളുടെ ജീവിതവും
അതിലുണ്ടായിരുന്നു .
അവളുടെ കവിത അവള്
തന്നെയായിരുന്നു .
പരിചയം കുറേക്കൂടി കടുത്തു ,
വീട് ,കുടുംബം ,
നാട് എല്ലാം അവളുടെ
വാക്കുകളില് പരിചിതങ്ങളായി .
അടുപ്പം കുറേക്കൂടി
ദൃഢത കൈവരിച്ചു .
ആ ബന്ധത്തിനൊരു
പേര് നല്കുക പ്രയാസമായിരുന്നു .
അതങ്ങനെ പല പ്രകാരങ്ങളില്
വളര്ന്നു പന്തലിച്ചു .
സ്വന്തം മനസ്സുകൊണ്ട്,
അവളിലേക്ക്
ഒരുപാട് ദൂരങ്ങള് ഞാന് താണ്ടി .
സ്നേഹത്തിന്റെ ,
സൗഹൃദത്തിന്റെ ,
പ്രണയത്തിന്റെ ,
കാമത്തിന്റെ വഴികളില്
തനിച്ചു സഞ്ചരിക്കുകയും
വെറുതെ തിരിച്ചു വരികയും ചെയ്തു .
ഒരു ബന്ധങ്ങളിലും ,
ആ പരിചയം തളച്ചിടാനായില്ല .
ജീവിതം മാത്രമല്ല ,
എല്ലാ രഹസ്യങ്ങളും
ഒന്നൊഴിയാതെ അവള്ക്ക്
പറയാനുള്ള
ഒരാളായിരുന്നു ഞാന് .
പറയുന്നതെല്ലാം ശ്രദ്ധയോടെ
കേള്ക്കുന്ന നല്ലൊരു
കേള്വിക്കാരനാവാന്
എനിക്കും കഴിഞ്ഞിരുന്നു .
അതാവണം അവളെന്നില് നിന്ന് പ്രതീക്ഷിക്കുന്നതെന്ന്
ഞാനും കരുതി .
അവളെ ആകര്ഷിക്കുന്നൊരു
ആകാരമോ സൗന്ദര്യമോ
എനിക്കുണ്ടായിരുന്നില്ല .
സാമ്പത്തീകമായി ഒന്നും
സഹായിക്കാനാവാത്ത
എന്റെ അവസ്ഥയും
അവള്ക്കറിയാം .
അവളെ സ്വന്തമാക്കാനാവാത്ത
സാഹചര്യങ്ങളെ
ഞാന് തിരിച്ചറിഞ്ഞിരുന്നു
ആ ബോധ്യത്തില്
അവളെക്കുറിച്ചുള്ള
എന്റെ വിചാരങ്ങളൊന്നും
അവളോടു ഞാന് പറഞ്ഞില്ല .
പറഞ്ഞാല് അത്
ഞങ്ങളുടെ പരിചയത്തെ
തടസ്സപ്പെടുത്തുമെന്ന ഒരു തോന്നല്
എന്നെ വല്ലാതെ അലട്ടിയിരുന്നു .
അവളെന്നെ എങ്ങനെയാവും കാണുന്നതെന്നറിയാനുള്ള
ആകാംക്ഷ എനിക്കുമുണ്ടായിരുന്നു .
ഒരിക്കല് അവള് മനസ്സു
തുറക്കുമെന്ന വിശ്വാസത്തില്
ഞാനും കാത്തിരുന്നു .
ശരീരം മാത്രം വരുമാനത്തിനായി
ബാക്കിയുണ്ട് എന്നൊരറിവ്
അവള് എന്നോട് പങ്കു വെച്ച ദിവസം,
എല്ലാമറിയുന്ന ഒരാളായിട്ടു പോലും
ഒരസഹ്യത എനിക്കനുഭവപ്പെട്ടു .
ഉപദേശിക്കാനൊരുപാടുണ്ട് .
ഇതുവരെ കണ്ടതും ,കേട്ടതും ,
പിന്നെ കൂട്ടിച്ചേര്ത്തു
പറയാവുന്നതുമായ
ഉപദേശങ്ങളുടെ ഒരു കൂമ്പാരം
മുന്നിലുണ്ടിയിട്ടും
ഒന്നും പറയാനായില്ല .
ബദലെന്തെങ്കിലും
നിര്ദ്ദേശിക്കാനുമായില്ല .
എന്തു വേണം ?
ഞാനൊരുപാടാലോചിച്ചു .
ഈ ബന്ധം തുടരുന്നതിലുള്ള
ഒരുപാട് പ്രശ്നങ്ങള്
മുന്നിലുയര്ന്നു വന്നു .
ഫോണ് വഴിയുള്ള നിരന്തരമായ
വിവരങ്ങളുടെ കൈമാറ്റം ,
അപകടകരമായ ചുറ്റുപാടില്
അവള് .
അവളനുഭവിക്കുന്ന
ശാരീരിക പീഡനങ്ങളേയും ,
ലൈംഗീക വൈകൃതങ്ങളേയും
കുറിച്ചുള്ള അവളുടെ തന്നെ
സങ്കടകരമായ വിവരണങ്ങള് .
അവള് പിടിക്കപ്പെടാനും
അപകടപ്പെടാനുമുള്ള
സാധ്യതകളുമേറെ ,
അവളുടെ ഫോണ് വിവരങ്ങള്
എന്നേയും അപകടപ്പെടുത്തുമെന്ന
ഭയം എന്നിലും ഉരുണ്ടു
കൂടാന് തുടങ്ങി .
എന്നാലും ഇതവസാനിപ്പിക്കാം
എന്നു പറയാന്
എനിക്ക് കഴിഞ്ഞില്ല .
കൈയ്യില് സ്വരൂപിച്ച
കുറച്ച് കാശ്
നാട്ടിലെത്തിക്കാനുള്ള അത്യാവശ്യം
വന്നപ്പോള് അവള് വിളിച്ചു .
''നിങ്ങളുടെ നഗരത്തിലൂടെ
ഞാന് വരുന്നു
ഒന്നു കാണാന് പറ്റുമോ'' ?
പെട്ടെന്ന് മറുപടിയൊന്നും വന്നില്ല ,
പകരം ''ലേശം തിരക്ക്
ഞാന് അങ്ങോട്ട് വിളിക്കാം*'
എന്നു മാത്രം പറഞ്ഞു .
ഏറെ ചിന്തകള്ക്ക് ശേഷം ,
വരാമെന്നു പറഞ്ഞു.
ഫോട്ടോയില് കണ്ട രൂപം മാത്രമേ
മനസ്സിലുള്ളു .
ആദ്യമായാണ് നേരില് കാണുന്നത് .
''നിങ്ങളുടെ നഗരത്തിലെ
ഒരാളുടെ അപ്പാര്ട്ട്മെന്റിലാണ് .
ഇന്ന് രാത്രി അയാളോടൊപ്പം ,
നാളേയേ നാട്ടിലേക്കു പോകൂ'' .
അങ്ങനെയാണവള് പറഞ്ഞത് .
പരിചിതയെങ്കിലും ഒരു സ്ത്രീയെ
ഒരപ്പാര്ട്ടുമെന്റില് തനിയെ
കാണുന്നത് ആദ്യമാണ് .
വലിയൊരപകടം എന്നെ
പിന്തുടരുന്നു എന്ന തോന്നല്
എന്നെ വല്ലാതെ
അസ്വസ്ഥമാക്കിക്കൊണ്ടിരുന്നു .
വളരെ സൗകര്യമുള്ളൊരു വീട് .
വാതില് തുറന്ന അവളെ കണ്ട്
ഞാന് അത്ഭുതപ്പെട്ടു,
ഫോട്ടോയില് കണ്ടതിനേക്കാള് ,
സുന്ദരി .
എങ്ങനെ എവിടെ തുടങ്ങണമെന്ന്
ആലോചിച്ചു കൊണ്ടിരിക്കേ
അവള് തുടങ്ങി .
''മനസ്സിലുണ്ടായിരുന്ന നിങ്ങള്ക്ക്
ഇത്ര പ്രായമുണ്ടായിരുന്നില്ല ,
ശബ്ദത്തിനും
നിങ്ങളുടെ വരികള്ക്കും തീരേ
ചെറുപ്പമാണ് ''.
അവളൊരുപാട് സംസാരിച്ചു .
ഞാനൊരു നല്ല കേള്വിക്കാരനായി .
കുടുംബം ,ജീവിതം ,
പരാധീനതകളും ,പ്രയാസങ്ങളും ,
അവസാനിക്കാത്ത കടം
സംസാരം നീണ്ടു .
''അയാളെപ്പോ വരും''
ഇടയില് ഞാന് ചോദിച്ചു .
''അയാള് രാത്രിയാവും ഭയപ്പെടേണ്ട''
എനിക്ക് സത്യത്തില് നല്ല
ഭയമുണ്ടായിരുന്നു .
''വന്നാലും കുഴപ്പമില്ല
അഞ്ഞൂറു രൂപ
അയാള്ക്ക് നല്കിയാല് മതി
ഒരാള്ക്കുള്ള കമ്മീഷന് 500 രൂപ''
അവളുടെ സംസാരം
തീര്ന്നു തുടങ്ങി
മൗനം മുറിയില് ചിറകു വിരിച്ചു .
ഞാനവളുടെ കണ്ണിലേക്കു നോക്കി
കണ്ണുകള്ക്ക് വല്ലാത്തൊരു പ്രകാശം .
പോകാനായി ,ഞാനെഴുന്നേറ്റു .
അവളടുത്തു വന്നു .
പെട്ടെന്ന് ,
അവളെന്നെ കെട്ടിപ്പുണര്ന്നു .
സുഖകരമായൊരു
കുളിരെന്നെ വന്നു പൊതിയുന്നു
തിരിച്ചറിയാനാവാത്തൊരനുഭൂതിയില്
ഞാനമര്ന്നു.
മുടിയിഴകളില് വിരലോടിച്ചു കൊണ്ട്
ഞാനവളുടെ മുഖത്തേക്കു നോക്കി
എന്തിനോ വിറക്കുന്ന അവളുടെ
ചുണ്ടുകള്
ചിലപ്പോള് എന്റെ തോന്നലാവാം .
ഞങ്ങളുുടെ തോന്നലിന്
വിലക്കുകളോ തടസ്സങ്ങളോ
ഒന്നും തന്നെ
ഞങ്ങളുടെ മുന്നിലുണ്ടായിരുന്നില്ല.
അവളുടെ ദേഹം ചൂടു പിടിക്കുന്നതയി
എനിക്കനുഭവപ്പെട്ടു .
അതോ ചൂടു പിടിക്കുന്നത്
എന്റെ ശരീരമാണോ ?
ശ്വാസോച്ഛാസ
ഗതിയുടെ വേഗം വര്ദ്ധിക്കുന്നു .
ആര്ത്തിരമ്പി വരുന്ന ഒരു
തിരമാല ഞങ്ങളെ വന്നു
മൂടുന്നതു പോലെ ,
ആടിയുലഞ്ഞതില്
അലിഞ്ഞു ചേരുന്നതിനു
മുന്പ്ആര്ത്തലച്ചു വന്ന
ആ കടലില് നിന്ന്
ഞങ്ങള്, കരകയറി.
സ്ഥലകാല ബോധത്തിലേക്ക്
ഞങ്ങള് തിരിച്ചെത്തി .
ആ മുഖം കൈകളില്
കോരിയെടുത്ത്
ഒരല്പമുയര്ത്തി ഞാനാ
നെറുകയില് ജീവിതം ചേര്ത്തു
വെച്ചൊരുമ്മ നല്കി.
അവളത് ജീവിതം കൊണ്ടേറ്റു
വാങ്ങുന്നത് ഞാനും അനുഭവിച്ചു .
അവളുടെ കൈകള് പതുക്കെ
അയഞ്ഞു,
മുഖം കുനിഞ്ഞു .
ഞാന് പുറത്തിറങ്ങി .
പിന്നില് വാതിലടഞ്ഞു .
ഒരു വിവരുമില്ലാതെ ആഴ്ച ഒന്നു
കടന്നു പോയി .
അടുത്ത ദിവസം അവളുടെ
ഒരു വാട്ടസ് ആപ്പ് ടെക്സ്റ്റ് മെസേജ് .
''ഞാന് എല്ലാം അവസാനിപ്പിക്കുന്നു
എന്റെ ശരീരം എന്റേതു
മാത്രമാക്കുന്നു
എല്ലാ പരിചയങ്ങളും
അവസാനിപ്പിക്കുന്നു
ഈ നമ്പര് ബ്ലോക്ക് ചെയ്യുന്നു .
എന്റെ ഫോണ് പുതിയ
നമ്പറിലേക്ക് മാറ്റുന്നു
ഇനിയൊരിക്കലും
കണ്ടുമുട്ടാനിടവരുതേ
എന്നാഗ്രഹിച്ചു കൊണ്ട് .
സ്മിത ''
എന്റെ ഫോണ് നമ്പര് ഞാന്
മാറ്റിയില്ല .
അവളുടെ കൈയ്യില്
എന്റെ നമ്പറുണ്ട് .
ഒരു ഫോണ് കോള്
ഒരു വാട്ടസ്ആപ്പ് മെസേജ്
എന്നെങ്കിലും വന്നേക്കാമെന്നു
കരുതി ഞാനും കാത്തിരിക്കുന്നു ,
വെറുതേ …
ഗോപിനാഥ് കെ .
No comments:
Post a Comment