നനവ്

മഴ നനഞ്ഞു കുതിരുന്ന 

ചെമ്പരത്തിക്കാടിന്‍റെ 

ഉള്ളില്‍  ആരും കാണാത്തൊരു

ചെമ്പരത്തിപ്പൂവുണ്ട് ,

ചുവന്നു തുടുത്ത് .

അതിനൊന്നു നനയാന്‍

വല്ലാത്തൊരു മോഹം ,

പൂത്തു ചിതറുന്നു,

മഴച്ചില്ലുകള്‍ പോലെ .

മഴത്തുള്ളികള്‍ ,

ഇലകളില്‍ 

തട്ടിത്തെറിച്ചൊന്നില്‍ 

നിന്ന് താഴെ മറ്റൊന്നിലേക്ക് 

പിന്നേയും മറ്റൊന്നിലേക്കങ്ങനെ 

പൂവിനെ പൊതിയുന്ന

ഇലകളില്‍ വീണ് ,

പൂവിനെ നനക്കാതെ 

താഴെ മണ്ണില്‍ വീണൊഴുകുന്നു.

ചാലുകള്‍ തീര്‍ത്ത് ,

തോടുകളായി,

പുഴയിലേക്കൊഴുകിയകലുന്ന

മഴത്തുള്ളികള്‍ നോക്കി,

ഇലകളില്ലാത്തൊരു 

കൊമ്പില്‍ പൂത്ത് ,

ചരല്‍ക്കല്ലുകളായ് 

പതിക്കുന്ന മഴത്തുള്ളികള്‍ 

ഇതളുകളില്‍ ഏറ്റുവാങ്ങി 

ഒന്നു നനയാന്‍ കൊതിച്ച് 

ചെമ്പരത്തിപ്പൂവ് ഇനിയുമൊരു 

മഴയ്ക്കായ് കാത്തിരുന്നു .

ഗോപിനാഥ് കെ